Atzo hasi zen ‘Hondarribia zu zara’ kanpaina, Hondarribiko ostalaritzak eta merkataritzak dakarren aberastasun kulturala eta ekonomikoa herritarren aurrean balioan jartzen duen ekimena.
Plan honek hondarribiar guztiok kate honetan ematen dugun balio erantsia hurbildu eta ikusarazi nahi du. Balio horrek bat egiten gaitu Hondarribiarekin”, esan du Maria Serranok, Sustapen Ekonomikorako, Merkataritza eta Turismo zinegotziak.
“Kanpainarekin ez dugu ostalaritza eta merkataritza sektorea bakarrik ikusarazten. Gainera, egungo balio-kate osoa sartzen dugu, ekoizlearengandik hasi eta azken kontsumitzailearenganaino, tokiko eta kanpoko kontsumitzailearenganaino, hala nola ostalariak eta ostalaritza-establezimenduetako langileak, tokiko merkataritza, beste lanbide laguntzaile batzuk (saregileak), baina baita hondarribiar bezeroa eta turista ere”.
“Gobernu taldea gure bizitzan normaltasuna berreskuratzeko ahaleginetan ari da. Profesionalek pandemiaren aurretik eta pandemian zehar egindako lana aitortu nahi dugu; gure helburua gurearen eta hemengoaren alde egitea da, turismo eredu jasangarri eta herritarrekiko adeitsuari eutsiz”, gehitu du Serranok.
Hondarribiko sare ekonomikoaren ordezkaritza garrantzitsu batek parte hartu du: 50 pertsona, ostalariak, merkatariak, arrantzaleak, saregileak, baserritarrak, landetxeetako arduradunak…
5 totem jarri dira, zehazki, Mendelun, Amuten, Zumardian, Kiroldegian eta Hondartzan, eta 18 panel Itsasoan. Prentsan eta sare sozialetan kanpainak egingo dira ekainaren 30era arte, eta herriko eragile askok parte hartzen duten bideo bat egin da, sare sozialen bidez iragartzen ari dena.
