Irungo Udalak jakinarazi duenez, Obra arloa Junkal plazatxoa eta karrika eta ingurune osoa berritzeko lanean ari da dagoeneko, eta, ildo horretatik, lehenik, proiektuaren idazketa esleitu du, ingurune osoaren berrurbanizazioari heltzeko aukerak taxutzeko eta aztertzeko.
Obretako ordezkaria den Cristina Labordak nabarmendu duenez, “beharrezkoa iruditzen zaigu jarduketa, eta, gainera, herritarrek ere eskatu digute; are gehiago, 2018ko aurrekontuak partaidetza bidez egiteko prozesuaren barruan babesik handiena izan zuten proposamenetako bat da. Proiektuaren bidez, Junkal plazatxoan eta karrikan bertan esku hartzeaz gain, itxura berria eman nahi diogu ingurune osoari, eta, horretarako, Nafarroa hiribidearen azpiko tunela berritu ere egingo dugu”.
Fasetan
Obra arloak azaldu du fasetan egingo direla hobekuntza lanak eta Junkal karrika berrurbanizatzeaz gain (tartean, Nafarroa hiribidearen azpiko tunela berrituko da, baoa handituta eta, horrela, ikuseremua zabalduta) Junkal plazatxoa bera berrurbanizatuko dela.
Era berean, hiriko ondare historikoaren barruko elementurik adierazgarrienetako batean esku hartuko da: Junkal elizako argiterian. Azkenik, lurpeko aparkaleku bat eraikitzearen eta azterketa arkeologiko bat egitearen bideragarritasuna aztertuko da. Proiektuaren idazketa Girder Ingenieros enpresari esleitu zaio, eta aurrekontua 71.995 eurokoa da.
