Udaleko Hezkuntza departamentuak antolatuta, 2017/2018 ikasturte honetan ere Hondarribiko haur eta lehen hezkuntzako ikasleek Itsas Etxean euskarazko zinea eta kontzertu pedagogikoetaz gozatzeko aukera dute. Talaia, San José eta Ama Guadalupekoa ikastetxeetako 3.345 ikasle eta irakaslek parte hartzen dute ekimenean.
2016/2017 ikasturteko “Euskara zine aretoetara, Tinko” programak bost euskarazko zine-emanaldi eskainiko ditu. Hondarribiko ikastetxeetako lehen eta haur hezkuntzako ikasleentzat euskarazko zinea eskaintzea da helburua, Udalak ikasleentzat antolatzen diren jarduera pedagogikoen barne.
Lehena asteazken honetan, otsailaren 14an izango da, Luke eta Lucy, lehen hezkuntzako lehen eta bigarren mailako ikasleentzat. Gainontzekoak martxoan eta apirilean egingo dira, egutegiak erakusten duen moduan. Ikusiko dituzten filmeen artean, Tarzán, Koko2 eta Ballerina daude.
Sei kontzertu pedagogiko
Musika emanaldiei dagokienez, ikasturte honetarako sei kontzertu aurreikusten dira. Horietatik lehena martxoaren 2an izango da, hari laukotearen eskutik. Maider Aizpurua eta Leire Hipolito (bibolinak), Imanol Martínez (biola) eta Amaia García (biolontxeloak) ikuskizuna emango diete lehen hezkuntzako ikasleei. Gainontzeko emanaldiak martxoan eta apirilean izango dira era berean. Sei emanaldi hauetako bat dantza klasiko eta euskal dantza ikuskizuna izango da.
“Jarduera guztiek helburu nagusi batzuk jarraitzen dituzte: alde batetik, Hondarribiko ahalik eta ikasle gehien kultur adierazpide zenbaitera hurbiltzeko aukera ematea. Hortaz gain, eskolaz kanpoko jarduerak aberasteko bide bat jartzea bilatzen dugu, baita ohitura batzuetan eragitea gure gazteei, kasu honetan, Itsas Etxea auditoriumera hurbildu eta kulturaz gozatzea. Azken helburua eta oso garrantzitasua, euskararen presentzia eskolaz kanpoan areagotzea da”, esan du Kalixa Silanesek, Hezkuntzako zinegotziak.
